Joh 4 | NAS | STEP | Eeꞌnoko teinge Boto Keperuuꞌnavitu~ taaravauꞌ Jiisuuꞌke mmauꞌ barevare-nupoong bokuvurima ntong-koo minkivurima meekaꞌantavuriko Jooni-koo dau basinooꞌ.

John 4

Jiisuuꞌ Eeꞌnoko Nani Sameriaꞌnani Nariꞌ Minkuaretuꞌnaꞌ

1 Eeꞌnoko teinge Boto Keperuuꞌnavitu~ taaravauꞌ Jiisuuꞌke mmauꞌ barevare-nupoong bokuvurima ntong-koo minkivurima meekaꞌantavuriko Jooni-koo dau basinooꞌ. 2 Aꞌnooꞌ Jiisuuꞌke baka nantoong ntong-koo minkie meekaꞌantavuriaꞌ; niiꞌke bakaninge barevare-nupoonge nainge deekoꞌ minkiarampima meekaꞌantavarampikoꞌ. 3 Teketa Jiisuuꞌke tee kara taaravuraiꞌnange Judiaꞌnameng-eta toroaruꞌ Kaaleliꞌaape. 4 Eeꞌnoko maroita tevung taung-navunge Sameriaꞌnamenge tankinui-navunge siong-antamuruꞌ, niiꞌke Juꞌnupoonge baariꞌampimanavunge. ^{▼▼4:4Juꞌnupoonge Sameriaꞌke tankinaavarupeuꞌ, aiꞌ teing teing oovu-nupoong deempariruꞌning, Asiria-nupoong ninka nampeema, kare-koo tavarira nkavaaruꞌnooꞌketa.}

5 Eeꞌnoko Sameriaꞌnameng-koo tumarira osi tavoꞌmariruꞌ miring Saikaaꞌ. Teꞌ eeꞌnooꞌ baruꞌ isipoꞌ deeaꞌ Jeekopiꞌke bauring Josepaꞌ avuuꞌnau-koo. 6 Teꞌ eeꞌnooꞌ Jeekopiꞌ bakaang dinkung ntong-poꞌnung otokoꞌnooꞌ. Eeꞌnoko Jiisuuꞌ nanuꞌkoo takaaꞌora teꞌ baꞌnamparuꞌ tee-anko dinkung-anko. Tenang eeꞌnang muung-aapenang.

7 Jiisuuꞌ teꞌ baꞌnampari otoko niiꞌ bakaning barevare-nupoong osi nanampiruꞌ taamang mooꞌampiiꞌnaang. Eeꞌnoko tee, Jiisuuꞌ sipampirioꞌ nani Sameriaꞌkoonani teꞌ ntong nkeꞌkoo dinkung-koo pouꞌ. Eeꞌnoko Jiisuuꞌke aaꞌpuuꞌ, “Ntong-koo ameai.” 9 Teketa Sameriaꞌnanie aaꞌpuuꞌ, “Daꞌ Juꞌkoong, eeꞌnoko ning Sameriaꞌnani. Arekeeꞌ ning dake niaꞌmemaang ntong-koo aromaꞌnaang?” (Juꞌnupoonge kompaavaung kapooꞌ Sameriaꞌnupoonge taamanaama kompaamaing. Teeꞌkoo tenie teeꞌ minkuvuuꞌ.)

10 Eeꞌnoko Jiisuuꞌke makuꞌuma aaꞌpuuꞌ, “Ee bakaꞌ, dake noruꞌei dei Kumponing-nung bautaꞌ eeꞌnoko ning baa eeꞌnara niaꞌdamaang ntong-koo, ning eeꞌnara niaꞌmepeuꞌ. Niaꞌmeko ninge arompeuꞌ ntong domaang-poꞌnung.” 11 Eeꞌnoko tenie manikumai makuꞌuma aaꞌpuuꞌ, “Ee aung, nnaꞌ daꞌ baakete otoꞌderuaꞌ, eeꞌnoko aung dinkung baruꞌ isikung masikung. Arekeeꞌ nkavepeuꞌ tee ntong domaang-poꞌnung? 12 Niikaakai Jeekopiꞌke aung dinkung ntong-poꞌnung amuruꞌ. Tee eeꞌnara eeꞌnoko baurukaaꞌ eeꞌnoko bakaning boromakaꞌ dovang sipisipiꞌ ookara aruꞌkoo naikauꞌ. Emuꞌ daꞌ ee Jeekopiꞌkoo dau basi tantaramaang?”

13 Jiisuuꞌke kara makuꞌuma aaꞌpuuꞌ, “Nantoong aung-koo dinkung-koonaruꞌkoo naikaara napoꞌ nukaaꞌoropeuꞌ. 14 Nantoong teing ninge ntong avorompaining napoꞌ nukaaꞌoroaukaꞌnung. Teruꞌ avorompainaruꞌ teing-koo kuunge puunta-poꞌnaruꞌ deemparavaing ntong domaang-poꞌnung doong kante tavoꞌaramatoainaꞌ teing-koo, domaang oparavaukaꞌnung otoꞌevuriainaꞌ.” 15 Eeꞌnoko tenie manikumai makuꞌuma aaꞌpuuꞌ, “Eeꞌ, ameaing tee eeꞌnara ntong. Ning teeꞌ nariꞌ otoꞌkoo piamomaang, napoꞌ ntong-koo nukaaꞌmoaukaꞌ, napoꞌ kemuꞌkanaꞌ moaukaꞌnaꞌ ntong nkeꞌkoo.”

16 Enang tee Jiisuuꞌke botovuma aaꞌpuuꞌ, “Bera daꞌung bokuera aꞌ poreaing.” 17 Tenie manikumai aaꞌpuuꞌ, “A, ning aaꞌ inung oꞌnoai.” Jiisuuꞌke makuꞌuma aaꞌpuuꞌ, “Eeꞌ. Daang deeaꞌ. Masikaꞌ minkuemaang teeꞌ aaꞌpema, ‘Ning aaꞌ inung oꞌnoai.’ 18 Daꞌ paꞌnokoꞌke nantoonge nantauꞌnani, eeꞌnoko tee naning enang daꞌ ninka otoresing daꞌung masikung deeaꞌ. Masikaꞌ naumeing.” 19 Eeꞌnoko tee, tenie aaꞌpuuꞌ, “Ee aung, daꞌ masikaꞌdarioꞌ ninge nakaronung-pinaꞌ noruꞌdamaang. 20 Niikakatauroi Sameriaꞌnupoonge amii-koo Kumponing boontuaakoꞌ, dootuuꞌ nkoaama; eeꞌnoko diiꞌke Juꞌnupoonge aaꞌperimaung, ‘Jerusalemaꞌ naroꞌke Kumponing boontuampimaatoaing.’”

21 Jiisuuꞌke aaꞌpuuꞌ teni manikuma, “Masikaꞌantameaing, ee ani, batei tavoꞌaravaing amii-koo eeꞌnoko Jerusalemaꞌke nantoonge Tee Niuma dootuuꞌaama boontuaavaukaꞌnung. 22 Diiꞌke Sameriaꞌnupoonge baruꞌ noruꞌeriaꞌ tee dootuuꞌerimaung. Niiꞌke Juꞌnupoonge tampaꞌ noruꞌampiri otong tee dootuuꞌampimaung. Kumponinge tee Domang-antanung Ju-nupoong-koong tavoꞌaraaꞌnaang tampuuꞌnung-koo. 23 Tee batei pomaang, aung aaꞌ otong, tenang Tee Niuma dootuuꞌarimainge masikenge tanuaang-aapenaꞌ domange arooꞌariri masikaꞌ dootuuꞌaavainang. Teing temuriiꞌnaꞌ dootuuꞌnupoong Tee Niuma piavomaung. 24 Kumponing tee Tanuaang. Teeꞌkoo Kumponinge maromurimaung tanuaang-aapenaꞌ dootuuꞌampiiꞌnaang domaang-eta, arooꞌmariri masikaꞌ.”

25 Manikumai aaꞌpuuꞌ, “Ninge noruꞌansi oꞌnong tee Kumponinge urikamuꞌketa Pakoꞌpariꞌniiꞌ, Karistooꞌ tampaamaung pooꞌnaang. Tee eeꞌnara pora ookara kapooꞌ naumuriaing.” 26 Jiisuuꞌke makuꞌuma aaꞌpuuꞌ, “Ning tee eeꞌnara daꞌ ninka karompemaang.”

27 Eeꞌnoko tenang eeꞌnang niiꞌ bakaning barevare-nupoong toromarima bakei aaꞌnaꞌ taꞌninampiruꞌ manikuma ninka minkuareko, nka niaꞌampima aaꞌpampiaruuꞌ, “Aming piaromaang?” niiꞌnaꞌ “Aming-koo minkuraremang teni ninka?”

28 Eeꞌnoko tenie manikumai tee utau teꞌ sipura nanuuꞌ osi-aape. Eeꞌnoko osi-nupoong nauvurima aaꞌpuruꞌ, 29 “Porira naning ooveriaing kapooꞌ ookara ninge tero nkoankoꞌning naumuinung. Aung eeꞌnara deeꞌma tee Pakoꞌpariꞌniiꞌ.” 30 Eeꞌnoko teing osi-eta porouꞌ Jiisuuꞌanko.

31 Tee aaꞌ nkoarioꞌ niiꞌke bakaninge barevare-nupoonge Jiisuuꞌ aaꞌnaꞌ niaꞌampiruꞌ aaꞌpampima, “Nau-anta Pankaing, taamang-koo naikiaing.” 32 Jiisuuꞌke kara makuꞌmemurima aaꞌmuruꞌ, “Ning nkaang taamang otoꞌmemuing diiꞌke noruꞌeriaꞌ.” 33 Eeꞌnoko teketa niiꞌ niiꞌka nianiaꞌ niaꞌmeerima aaꞌmeerikoꞌ, “Aiꞌ niiꞌninge aung taamang tavoꞌevainge?” 34 Jiisuuꞌke aaꞌmuruꞌ, “Ning-koo taamang baruꞌ kapooꞌ masikung deeaꞌ. Nka tee Kumponing bakaang nko-nko kapooꞌ masikung. Teie botomuuꞌnaꞌ tampaꞌ nkoansi dupeampaing.

35 “Diiꞌke eeꞌ minkuerimaung, ‘Keempampimanooꞌketa karekuri kaara makosi tankinuko taamang nkavampipeuꞌ.’ Nka diiꞌke ooveriaing mintoonanka. Enang namuꞌke petaaꞌoing, taamang kavuꞌnooꞌ makotuing. 36 Niiꞌke taamang nkavampima doturotumarimaung. Teeꞌpinaꞌ nantoong oosiarampimang domaang oparavaukaꞌnung otoꞌevuriiꞌnaang, niiꞌ sinang tanka-nupoong eeꞌnoko taamang nka-nupoong naroꞌmariri doturotumariainaꞌ. 37 Aung kara teinge minkuaamaung masikung, ‘Narunge keempuko niiꞌnunge taamang kavumaung.’ 38 Ninge diiꞌ botorampiring taamang nkaveriiꞌnaang mintoong-koo diiꞌ pakurariaruuꞌnau-koo. Aung tee niiꞌning mintoong-koo iriꞌopariring-koo diiꞌ tamung kavuꞌ narung-koo pakurarimang.”

39 Eeꞌnoko mmauꞌke Sameriaꞌnupoonge temono-nupoonge Jiisuuꞌ masikaꞌantavauꞌ, tenie eeꞌnani manikumai teeꞌ minkuvuma aaꞌpuioꞌ, “Teie kapooꞌ ookara naumuing tero nkoankoꞌning.” 40 Eeꞌnoko teing Sameriaꞌnupoong Jiisuuꞌanko porora aaꞌnaꞌ niaꞌauꞌ teꞌ otorooꞌnaang teing ninka. Eeꞌnoko tee Jiisuuꞌ temono-koo keꞌmunta doong otouꞌ.

41 Eeꞌnoko mmauꞌke napoꞌ masikaꞌantavauꞌ Jiisuuꞌ bakaang-koo kara-koo. 42 Eeꞌnoko teinge teni manikuma nauaama aaꞌpauꞌ, “Niiꞌke enang masikaꞌantavampiring tee-koo dake naumering-koo deeaꞌ, tee niiꞌke koontoꞌ taaravampiraiꞌnange. Tee eeꞌnara koontoꞌ noruꞌampiring tee Domang-antanung ookara kansiꞌnupoong.”

Jiisuuꞌke Daurarong~ Bakanaving-koong Bauring Tamparuꞌantavuuꞌnaꞌ

43 Eeꞌnoko tee, keꞌmunta doong teꞌ otoraiꞌnange Jiisuuꞌke temono sipura Kaaleliꞌaape napoꞌ nanuuꞌ. 44 Jiisuuꞌke aaꞌpukoꞌ, “Naning tee ning-pinaꞌ nakaronara bakanooꞌnupoonge nainge deekoꞌ masikaꞌantavaavaung.” 45 Teeꞌ nariꞌ Jiisuuꞌke bakanooꞌ osi Jerusalemaꞌ sipuraiꞌnange Kaaleliꞌnameng-koo tumparioꞌ tevoraꞌnupoonge onkeonkeꞌauꞌ. Aming-koo, nnaꞌ teing eeꞌning nanauꞌ Jerusalemaꞌaape Baariꞌkoong Paroro naiaavaꞌnaang, eeꞌnoko teꞌ otoroitaaꞌ ookara kapooꞌ Jiisuuꞌke tenang nkovuuꞌning ooauꞌ paroro-koo meuꞌke.

46 Eeꞌnoko Jiisuuꞌ napoꞌ toroaruꞌ Kana-namono-koo Kaaleliꞌnameng-koonooꞌ, ntong uaini deeng-antavuuꞌnooꞌ. Eeꞌnoko tee daurarong bakanaving-koong narung pankaing teꞌ otokoꞌ, bauring Kapaneumeꞌnamono-koo otoi siipavouꞌ. 47 Eeꞌnoko teie Jiisuuꞌ Kaaleliꞌaape pouꞌnung Judiaꞌketa taaravuuꞌ. Taaravura tee, Jiisuuꞌanko bera, niaꞌuuꞌ Kapaneumeꞌaape nanuuꞌnaang bauring taare-anta-koo, booꞌke dueꞌuko. 48 Jiisuuꞌke tee eeꞌnara aaꞌpuuꞌ, “Diiꞌkoo naning otoaꞌ masikaꞌantamepeuꞌnung tutung aaꞌnaꞌ iirakuta nko-nko oovuarura, taaꞌniꞌanta taꞌnimpaariiꞌnanka.” 49 Eeꞌnoko tee daurarong bakanaving-koonunge aaꞌpuuꞌ, “Niꞌninka poaing nnuring mmeꞌ booꞌparavaruko.” 50 Jiisuuꞌke makuꞌuma aaꞌpuuꞌ, “Bera naniaing. Dauring domamparavaing.” Eeꞌnoko teie naninge Jiisuuꞌ bakaang kara masikaꞌantavura nanuuꞌ. 51 Eeꞌnoko taunga toroarama bakaning-koong botovotonaaꞌnanka-koo niiꞌning kuneꞌuruꞌ. Eeꞌnoko teinge aaꞌpauꞌ, “Dauring domamparaaꞌnaang.” 52 Eeꞌnoko teie makuꞌurima aaꞌpuruꞌ, “Arenang tee eeꞌnang nnuring tampatampaꞌ deeꞌoinge?” Eeꞌnoko teinge aaꞌpauꞌ, “Keꞌmaakiꞌ mmeꞌ mutaanampuko uipaariiꞌ boimpuieeng.” 53 Eeꞌnoko baumai noruꞌuuꞌ tenang eeꞌnang batei basiarako Jiisuuꞌke nauvuma aaꞌpuuꞌnung, “Dauring domamparavaing.” Teeꞌkoo eeꞌnarai eeꞌnoko baurukaaꞌke Jiisuuꞌ masikaꞌantavauꞌ. 54 (-)